Act 14 | BEF | STEP | To Ikoniu hepato etali ana suhi aku'i hi'aha'ina. Polugo Banabasiugo Yuta bona'magi li gehesa hilata nehana nonugu tilete ka lu yege he'aha'ina. Etali kaga amuya'a hiti le'mo bati hite lu epi'igo yege yege Yuta bona'i hiti to fegutoga bona'magi hiti ana kaga komopa'ani lu mele'ahana.

Acts 14

Etali Ikoniu hepalugu mono foya li'aha'ina

1 To Ikoniu hepato etali ana suhi aku'i hi'aha'ina. Polugo Banabasiugo Yuta bona'magi li gehesa hilata nehana nonugu tilete ka lu yege he'aha'ina. Etali kaga amuya'a hiti le'mo bati hite lu epi'igo yege yege Yuta bona'i hiti to fegutoga bona'magi hiti ana kaga komopa'ani lu mele'ahana. 2 To ya hana Yuta bona'magi ana kaga komopa'anigu li memolose minanamagi fegutoga bona'i luga'a faga lu nelepibe lite enalitoga enele'mo melelete Yesutoga komopa'ani emite minana bona'i enipakafa hete faga faga nelabe lite ka epeki'ahana. 3 Polugo Banabasiugo yatama kana'a Ikoniu hepato nehite amuya melete Sipi Bomofihi ka'a lu yege he'aha'ina. Ya ha'igo Sipi Bouba babeyafana lumofihi lumofihi fato fato'i topa hose nasana hiti li etayato higo li huto hi'aha'ina. To ya'mananauba ai fulu kaga'a lamana'a ni'ibe luto boana'i enelepilibe luto yabe. 4 To ya'ma hepato boana'i loko hilete luga'amagi Yuta bona'magi hiti komopa'ani monetoga melete minago to luga'a bona'i Polunogo Banabasinogo etalitoga melete komopa'ani monetoga melete mine'ahana yabe.

5 Ya'mu lite fegutoga bona'i hiti to Yuta bona'i hiti kaba bo'ani hiti mino kelele lilete Polunogo Banabasinogo etele'mo sibina huloto efa kosatu i fililune lite lu keheli'ahana. 6 Ya lite lana kaga etali akehelilete ana hepa'i he'mite koli hite i minigite bite Likonia kegi'a loe tauni Lisitala hepa'i hiti to Tebe hepa'i asaga lagaso meso hepa'i ana loe tauni lebato ni'inalo bula ola hite mine'aha'ina. 7 To etali ya'mana hepatoga ka lamana'a lu yege hete mine'aha'ina yabe.

Etali Lisitala mono foya li'aha'ina

8 Lisitala hepalugu bo mone gigusa luga luga sibina loto fili'ehina ito'afu keto'ehigo kapo memolose minolata hu'ehina. 9 Ya'ma bouba Polu lina kaga'a kehelito mino'ehina. Ya higo Polu ana bo bu go bati hu'ehina kaga'a komopa'agu li molo'ehigo gigusa'a le'mo bati hilube luto keheli'ehina. 10 Ya huloto Polu ana bomofihi kehe napa ito lu emi'ehina: Kigigusaka fi su toto ho ti fefe lubo. Ya luto ligo ana'asilo ana bouba gigusa'a bati higo ho tiloto leke hoto mone'a kapo molo'ehina. 11 To ya higo babu boana'magi Polu li huto hu'ehinana bu gelete enali Likonia nogo'aniguti sipi kehe ilago bila ela hite ma lite li'ahana: Kilihe bona'mo suhi hite lolo hite yatai lalitoga limi'aha'ibe. 12 Ya lite kehe ilete Banabasihi Yeusio lite gi mele'ahana. To Polu kaga lulata bo nohibe lite gi'a Hemesio lite mele'ahana. 13 Ya'ma Yeusihi noha'a tauni beletoga ni'igo ana mamufa gilata bouba bulumaka yaga bo'a hiti to bilasi'a lose tose'i hiti lito tauni kasito o'ehina. Ya higo ai hiti to babu boana'i hiti kuguhi ge etimilune'mu hi'ahana. 14 Ya hilune'mu nehago Banabasiugo Polugo ana kaga kehelilete gukete'atiti hegege nehite etali ana boana'magi folagaha'anigu hololu lite bite ma lite kehe i'aha'ina. 15 Lenali ma bona'i henabe lite ya'ma suhi li huto hilune'mu nehabe? Lenali hana suhi huto bona'mo nohu'ibe. Le'ali fa'mene bo nohu'ibe. Le'ali ka lamana'a lenalitoga lu yege halu'ibe'mu o'ohu'ibe. Ya'ma kaga lamana'auba komopatini i gelehe hinogo foipa faipa hapatini he'milete minoba minoba bo Hu'mamofitogago komopatini emilo. Ya'ma bo Hu'mau ai kokuluma hiti me'i hiti hege nagami'i hiti to asaga'na nose menose'mofihi anagu ni'inamofihi lolo hu'ehina. 16 To ma'naka luto koyapa'i Hu'mau asaga boana'i enemeha'anilo he'mi epalago bila ela hite fato fato'i mine'ahana. 17 Ya huloto bona'magi nani kumu kehelilabe luto fala kito memino'ehina. Ai asaga yupahi lalitoga bati suhi hu letoto ai kokulumalugu nohuto lenalitoga ko'i lepigo kana'amu kana'amu foyatinigu maya hu mololata nohibe. Ai asaga nose'na lepigo nelete lenugufagu laga higo lenegelo bilata nehabe, luto Polu ya luto lu epi'ehina. 18 Polugo Banabasiugo etali ya'ma kaga la'ina babu boana'magi mekehelise kuguhi go etimilune'mu amuya mele'ahana yabe.

19 Ya nehago Atioki hepatoti Pisitia kegi'ati to Ikoniu hepatogati hiti Yuta bona'i luga'a ete babu boana'i kaga lu epigo enalitoga melelago Poluhi efa kosatu i fililete kefefe hite ya'ma nohi hepatogati fegutoga afili'ehibe lite le'mo he'mi'ahana yabe. 20 Ya hago Yesuhi kaga'a kehelise bona'magi Poluhi bite le'mo bego hago ai ho tiloto tauniga ya'ma aku'i ti'ehina. Eteka'a ai'a hiti Banabasi hiti Tebe hepato bi'aha'ina yabe.

Etali Silia kegi'a Atioki i behe hite bi'aha'ina

21 Polugo Banabasiugo ka lamana'a Tebe hepatoga lu yege ha'igo babu bona'i luga'amagi etali kaga keheli bati hilete etemege'i mele'ahana. Ya hilete i behe hite Lisitala hepato bilete yaloti Ikoniu to yaloti Atioki hepato Pisitia kegi'a bi'aha'ina. 22 Ya hilete etali Yesuhi kaga'a kehelise bona'magihi amuya melete mono ka lu epiba epiba hite li pili kalo lite lu epi'aha'ina. Ketana babu luto yata'a kofito bulototi alihi Hu'mamofihi kapo'agu tilune lite Polugo Banabasiugo lu epi'aha'ina yabe. 23 To asaga Yesuhi kaga'a kehelise bona'magi folagaha'aniguti kaba bo'ani mone enele'mo ho tila ho tila hi'aha'ina. Etali nose'na mo site minete nunumu hu epelete Sipi Bomofitoga komopa'ani molo emite minanamofihi yanugu enele'mo molo'ehina yabe.

24 To etali Pisitia kegi'a tite bumofa'na hi su helete alihi Pamifilia hepato heneti'aha'ina. 25 Etali Pega hepatoga ka lamana'a lu yege helete yaloti he'mite Atalia hepalugu limi'aha'ina yabe. 26 To Atalia hepatoti botigu ti'igo botiuba etele'moto Atioki bu'ehina. Koyapa'i ya'ma hepatoti Yesuhi kaga'a kehelise bona'magi Hu'mamofihi kaba hu etototo amuya etiminogo mono foya lila'ibe lite ai yanugu etele'mo mele'ahana. To etali ana mono foya li baga ilete i behe hite aku'i ana hepato e'aha'ina yabe.

27 Etali Atioki hepalugu nehetilete Yesutoga komopa'ani melete neminana bona'i kehe i nupa hilete Hu'mau etali'i kaba hu etoto'ehina hiti to fegutoga bona'magi kapo'ani li hokolo higo enali hiti ana hite aitoga komopa'ani mele'ahanamofihi kaga'a lu epi'aha'ina yabe. 28 Ya hilete etali ana Yesuhi kaga kehelise bona'i hiti babu kana anaga mine'aha'ina yabe.